अर्थव्यवस्था आणि समाज या ग्रंथाचे लेखक कोण आहेत?

अमेरिकेतील न्यूयॉर्क सिटी युनिव्हर्सिटीतील प्राध्यापक डॉ. डॉन रोबेथॅम हे प्रस्तुत पुस्तकाचे लेखक आहेत. शिकागो विद्यापीठाची पीएच. डी. पदवी विकासविषयक प्रश्नासंबंधी संशोधन करून त्यांनी संपादन केली. ‘ब्रिंगिंग प्रॉडक्शन बॅक इन’ (उत्पादनप्रक्रियेचा विचार पुन्हा आणण्यासाठी) हे पुस्तकाचे उपशीर्षक आहे. लेखकाने मुख्यतः सात प्रश्नांचा विचार, विवेचन आणि विश्लेषण केले आहे. अर्थवाद नाकारल्यामुळे सांस्कृतिक व समाजशास्त्रीय सिद्धांतांत अर्थशास्त्रीय बाजू कमकुवत राहिली व एकंदरीत विश्लेषण मंदावले. १९व्या व २०व्या शतकात समाजशास्त्र व मानववंश शास्त्रांनी जी कामगिरी बजावली तशी भूमिका अर्थशास्त्राने सांप्रत बजावावी असे आव्हान प्रस्तुत पुस्तक देते.

२०व्या शतकाच्या आरंभापासून कॉपोरेट (एकाधिकारशाही) भांडवलाचा उदय झाल्यापासून त्याचे महत्त्व जनसामान्य व सामाजिक शास्त्रांनी जाणून घेणे ही सर्वात महत्त्वाची अनुभवावर आधारलेली तात्विक वास्तवता आहे. या भूमिकेचे अनेक परिणाम झाले आहेत आणि ते परिणाम जागतिक सामाजिक, राजकीय व आर्थिक विकासाच्या उद्देशाने मूलभूत होते व अद्यापही ते तसेच आहेत.